🪔 🪔 🪔 દિવાળીની શુભેચ્છાઓ 🪔 🪔 🪔 🪔 | તું તારા દિલનો દીવો થા ને! ઓ રે! ઓ રે! ઓ ભાયા! | ભોગીલાલ ગાંધી

તું તારા દિલનો દીવો થા ને! ઓ રે! ઓ રે! ઓ ભાયા!

રખે કદી તું ઉછીનાં લેતો પારકાં તેજ ને છાયા;
એ રે ઉછીનાં ખૂટી જશે ને ઊડી જશે પડછાયા!
ઓ રે! ઓ રે ઓ ભાયા! તું.

કોડિયું તારું કાચી માટીનું, તેલ દિવેલ છુપાયાં;
નાની સળી અડી ન અડી પરગટશે રંગમાયા!
ઓ રે! ઓ રે ઓ ભાયા! તું.

આભના સૂરજ ચંન્દ્ર ને તારા, મોટા મોટા તેજરાયા;
આતમનો તારો પ્રગટાવ દીવો, તું વિણ સર્વ પરાયા!
ઓ રે! ઓ રે ઓ ભાયા! તું.

કવિ ભોગીલાલ ગાંધી

ભોગીલાલ ગાંધી 'ઉપવાસી'

Courtesy: google image

ભોગીલાલ ચુનીલાલ ગાંધી 'ઉપવાસી'

જન્મ : 26 જાન્યુઆરી 1911, મોડાસા;

અવસાન : 10 જૂન 2001, વડોદરા

અગ્રણી સ્વાતંત્ર્યસેનાની, ગૂજરાત વિદ્યાપીઠના સ્નાતક (1930), સર્વોદય કાર્યકર, 'વિશ્વમાનવ' સામયિક (1958)ના આદ્યતંત્રી, આંતરિક કટોકટી સામેના લોકસંઘર્ષ(1974-1977)માં અગ્રભૂમિકાના કર્મશીલ, જ્ઞાનગંગોત્રી ગ્રંથશ્રેણી (સરદાર પટેલ યુનિવર્સિટી)ના પ્રથમ સત્તાવીસ ગ્રંથ (1967–1990)ના લેખક, સંપાદક, પ્રકાશક.